Gavumenti ebeereko ky’ekola ku muwendo gw’abaana abawanduka mu masomero-Omubaka Balimwezo

Omubaka wa palamenti owa Nakawa West Hon. Eng. Ronald Nsubuga Balimwezo asabye gavumenti okubaako kyekola ku muwendo gw’abaana abawanduka mu masomero nga tebanamaliriza misomo kulw’obulungi bweggwanga.

Eng. Balimwezo okwogera bino asinzidde munsisinkano y’abavubuka eya National Youth Leadership Dialogue 2023 etegekeddwa ekitongole ky’abavubuka ekya Open space Centre okubangula abakulembeze b’abavubuka n’okukubaganya ebirowoozo ku nsonga z’obukulembeze mubavubuka, okwo teekako okutunuulira butya bamusaayi muto bwebetaba mukubaga embalirira ku Eureka Place Hotel e’Ntinda mu Kampala.Abavubuka bano bagamba nti gavumenti ebalekeredde nnyo munsonga z’enkulakulana.

Hon. Balimwezo asabye abavubuka okwenyigira mubukulembeze kubanga omuwendo gw’abavubuka abakulembeze gukyaali mutono bwogerageranya n’omuwendo gwabwe. Hon. Balimwezo asabye abavubuka okwekiririzamu wamu n’okwongera kubukugu bwebalina kibanguyire okuvuganya mukatale k’emirimu akokuvuganya. Ono mungeri yemu asabye gavumenti okusosowaza ensonga z’abavubuka kubanga bebakola omuwendo omunene nga bwebabera mubwaavu eggwanga lyonna libeera lyavu.

Ensisinkano eno yakumala ennaku bbiri nga eyindira ku Eureka Hotel era yakukomekerezebwa kulwokutano luno era yetabiddwamu abakulembeze babavubuka okuva mu bitundu byeggwanga ebyenjawulo wamu n’abakulembeze babavubuka abaliko obulemu.

Ashiraf Sharaf Kakaire omukwanaganya w’emirimu mukitongole kyabavubuka kino ekya Open Space agambye nti ensisinkano eno elubiriddwamu kujjukiza bavubuka kukyebatekeddwa okola wamu ne gavumenti okumanya obuvunanyizibwa bwayo eri abavubuka naddala mukiseera webakolera embalirira okuwa omukisa abavubuka okwetaba mukutuusa ebirowoozo byabwe kumbalirira.

Ashiraf agambye nti olukungaana luno welunagweera abavubuka bajjakuba bategedde butya bwebayinza obutalekebwa mabega kubanga balese abakugu okubabangula kunkola ezenjawulo.

Bya Ismail Tenywa